110 年全國語文競賽客家語朗讀文章高中學生組 編號1號

 110 年全國語文競賽客家語朗讀文章高中學生組 編號1號

【遠方个人客】劉玉蕉原作

（海陸腔）

        毋知對哪日起勢，屋簷下恬索索咧！打早，大門吂開，心肝斯掛吊等該烏烏个身影，會入目珠來無？地泥下有屎好清無？門一開，探頭看著个係失望，𠊎等啊等仔，日頭慢慢仔徙步，晟到門檻來咧，空空个鳥竇，等毋著佢个主人，𠊎，等毋著𠊎个人客。

        春天，係造物者變奇術个季節。空氣肚還留有冷天个味緒，還較多个係春天个燒暖，清風撩人，在榮榮个花、嫩嫩个葉莖之間流連，蜂仔摎蝶仔也跈等歡喜採蜜！佢帶來生命，該，係毋係乜會帶來遠方个人客？𠊎日望夜想，出入大門時節，總會探頭看下，祈求該遠方个人客，千萬毋好毋記得自家个舊竇。

        一陣吱啁聲對屋簷下傳來，歸屋人躘等出去₁，頭昂昂看該熟事个身影，舊年个燕仔尋轉來咧，斯停在佢兜舊年結个鳥竇肚，兩隻烏烏个頭那探出來，四蕊目珠摎𠊎兜對看，算係相借問咧！𠊎兜有摎老朋友見面个歡喜，佢兜用清清亮亮个吱啁聲來回應！過後幾日，屋簷下當鬧熱，觜町銜泥个烏影，咻下出、咻下落，舊竇个上層，緊沿緊大、緊結緊高，會揬天篷哩喲，阿姆講：「愁麼个，佢兜毋會比你較戇啦！」係喲，恁遠地方尋得著路轉、會起屋戴，還毋會屙下來，𠊎正經輸悿悿哦！

        拶腹个鳥竇結到差毋多咧，日時頭兩隻燕仔輪流飛出去絡食，夜來一隻在竇肚，一隻跍在竇脣。阿姆講：「佢兜輪等在該孵卵哦！」正經，成半個月過，斯聽著幼幼个細燕仔聲咧，總共有四隻，鳥公摎鳥嫲出去尋食該下，佢兜會乖乖在竇肚等，一聽著爺哀銜蟲仔轉竇个聲哨，嘴斯擘大大搶愛食，做爺哀儕一輪過一輪飛出飛入，四張嘴像無底个深坑樣，逐到都嘴擘大大啾啾滾討食，奇怪个係，爺哀仰會知哪隻餵過、哪隻吂食？

        細燕仔生幼毛咧，媸媸个頭那殼長下弄啊弄仔探出鳥竇來，鳥公、鳥嫲跈等日頭个腳步還係飛出飛入，無閒直掣。細燕仔一日一日大，膴身个羽毛對灰色慢慢轉成烏金个翼毛該下，鳥公、鳥嫲斯會半拐半監佢兜學飛，這時節屋簷下盡鬧熱，乜係𠊎兜當歡喜个時節。慢慢仔，這綱細燕仔自家會絡食咧，斯恁樣生命又再過循環一到，生生不息。承蒙這竇燕仔，分𠊎兜體會著生活中个生趣事，同時乜感受著有阿爸阿姆守顧个幸福。

1 躘等出去：音 liungˇ nenˊ chud hiˇ；衝著出去。

__________________________

(四縣腔)

        毋知對哪日起勢，屋簷下恬索索咧！打早，大門吂開，心肝就掛吊等該烏烏个身影，會入目珠來無？地泥下有屎好清無？門一開，探頭看著个係失望，𠊎等啊等，日頭定定仔徙步，晟到戶檻₁來吔，空空个鳥竇，等毋著厥主人，𠊎，等毋著吾人客。

        春天，係造物者變奇術个季節。空氣裡肚還囥等有寒天个味緒，過較多个係春天个燒暖，清風撩人，在榮榮个花、嫩嫩个葉莖之間流連，蜂仔同蝶仔也跈等歡喜採蜜！佢帶來生命，該，係毋係乜會帶來遠方个人客？𠊎日望夜想，出入大門時節，總會探頭看一下仔，祈求該遠方个人客，千萬毋好毋記得自家个舊竇。 

        一陣啾啾滾个聲音對屋簷下傳來，歸屋下人縱2等出去，頭臥臥仔看該熟事个身影，舊年个燕仔倒轉來吔，就停在佢兜舊年結个鳥竇項，兩粒烏烏个頭那探出來，四蕊目珠同𠊎兜對看，算係相借問咧！𠊎兜有同老朋友見面个歡喜，佢兜用亮亮个啾啾聲來回應！過後幾日，屋簷下異鬧熱，觜項銜泥个烏影，咻啊出3、咻啊入，舊竇个上層，緊沿緊大、緊結緊高，會揬著天篷哩喲，阿姆講：「愁麼个，佢兜毋會比你較戇啦！」係唷，在恁遠个所在都尋得著路來轉、會起屋歇，還毋會分佢屙下來，𠊎正經輸悿悿哦！

        拶腹个鳥竇結到差毋多吔，日時頭兩隻燕仔輪流飛出去絡食，夜來一隻在竇肚，一隻跍在竇脣。阿姆講：「佢兜輪等在該孵卵哦！」正經，成半個月過，就聽著幼幼仔个細燕仔聲咧，總共有四隻，鳥公同鳥嫲出去尋食該下，佢兜會乖乖在竇肚等，一聽著爺哀銜蟲仔轉竇个聲說4，嘴就擘大大搶愛食，做爺哀儕个一輪過一輪5飛出飛入，四張嘴像無底深坑樣仔，逐到都嘴擘到大大啾啾滾討食，怪奇个係，爺哀仰會知哪隻餵過、哪隻吂食？

        細燕仔生幼毛吔，媸媸个頭那殼不時弄啊弄欸探出鳥竇來，鳥公、鳥嫲跈等日頭个腳步還係飛出飛入，無閒洎杈。細燕仔日日大，圓身个幼毛對灰色慢慢轉做烏金个翼毛該下，鳥公、鳥嫲就會半拐半監佢兜學飛，這時節屋簷下盡鬧熱，乜係𠊎兜盡歡喜个時節。定定仔，這竇細燕仔自家會絡食哩，就恁樣生命過再循環一到，生生不息。感謝這竇燕仔，分𠊎兜體會著生活中个生趣事，同時乜感受著有阿爸阿姆守顧个幸福。

1 戶檻：音 fuˇ kiamˊ；門檻。

2 縱：音 jiungˊ；身體猛力向前或向上。

3 咻啊出：音 xiu a cudˋ；箭速般往外飛。 

4 聲說：音 sangˊ sodˋ；聲音。

5 一輪過一輪：音 idˋ linˊ go idˋ linˊ；一趟又一趟。

__________________________

(南四縣腔)

        毋知對哪晡日起勢，屋簷下恬索索吔！打早，大門還無開，心肝就掛吊等該烏烏个身影，會入目珠來無？地泥下有屎好清無？門一開，探頭看著个係失望，𠊎等啊等仔，日頭緩緩仔徙步，晟到戶檻來吔，空空个鳥竇，等毋著厥主人，𠊎，等毋著𠊎个人客。

        春天，係造物者變奇術个季節。空氣裡背還留有寒天个味緒，過加多个係春天个燒暖。清風撩人，在榮榮个花、嫩嫩个葉莖之間流連，蜂仔同揚蝶仔乜跈等歡喜採蜜！佢帶來生命，該，係毋係乜會帶來遠方个人客？𠊎日望夜想，出入大門个時節，總會探頭看一下，祈求該遠方个人客，千萬毋好毋記得自家个舊竇。

        一陣啾啾聲對屋簷下傳來，歸屋人舂出去，頭臥等仔看該熟事个身影，舊年个燕仔尋歸來吔，就停在佢等舊年結个鳥竇項，兩粒烏烏个頭那探出來，四蕊目珠同𠊎等對看，算係相借問吔！𠊎等有同老朋友見面个歡喜，佢等用清清亮亮个啾啾聲來回應！過後幾日，屋簷下盡鬧熱，觜項銜泥个烏影，喊等出、喊等入，舊竇个上層，緊延緊大、緊結緊高，會揬天篷吔喲，阿姆講：「愁麼个，佢等毋會比你過戇啦！」係喲，恁遠所在尋得著路歸、會起屋歇，還毋會屙下來，𠊎正經輸啊盡悿哦！ 

        貼實个鳥竇結啊差毋多吔，日時頭兩隻燕仔輪等飛出去絡食；夜來一隻在竇項，一隻跍在竇脣。阿姆講：「佢等輪等在該孵卵哦！」正經，成半個月過，就聽著幼幼个細燕仔聲吔，總共有四隻。鳥公同鳥嫲出去尋食該下，佢等會乖乖在竇項等，一聽著爺哀銜蟲仔歸竇个聲說，嘴就擘大大搶愛食。做爺哀个一轉過一轉飛出飛入，四張嘴像無底个深坑樣仔，每一擺都嘴擘啊大大、啾啾滾討食，怪奇个係，爺哀仰會知哪隻餵過、哪隻還無食？

        細燕仔生幼毛吔，媸媸个頭那殼不時弄啊弄仔探出鳥竇來，鳥公、鳥嫲跈等日頭个腳步還係飛出飛入，無閒洎杈。細燕仔一日一日大，圓身个鳥毛對老鼠色慢慢轉做烏金个翼毛該下，鳥公、鳥嫲就會半拐半監佢等學飛，這時節屋簷下盡鬧熱，乜係𠊎盡歡喜个時節。慢慢仔，這綱細燕仔自家會絡食吔，就恁呢生命過再循環一到，生生不息。多謝這竇燕仔，分𠊎體會著生活中个生趣事，同時乜感受著有阿爸阿姆守顧个幸福。

__________________________

(大埔腔)

        毋知對哪日起勢，簷脣下恬芍芍咧！打早，大門吂開，心肝斯掛吊核該烏烏个身影，會入目珠來無？地泥下有屎好清無？門一開，探頭看著个係失望，𠊎等啊等，日頭寬寬徙步，晟到戶檻來咧，空空个鳥竇，等毋著厥主人，𠊎，等毋著吾人客。

        春天，係造物者變奇術个季節。空氣肚還存有寒天个味瑞，過較多个係春天个燒暖，清風撩人，在榮榮个花、嫩嫩个葉莖之間流連，蜂同蝶也跈緊歡喜採蜜！佢帶來生命，該，係毋係乜會帶來遠方个人客？𠊎日望夜想，出入大門時節，總會探頭看下，祈求該遠方个人客，千萬毋好毋記得自家个舊巢。 

        一陣吱啁聲對簷脣下傳來，歸屋人傱出去，頭臥臥看該熟事个身影，舊年个燕尋轉來咧，斯停在厥等舊年結个鳥竇項，兩粒烏烏个頭那探出來，四蕊目珠同吾等對看，算係相借問咧！吾等有同老朋友見面个歡喜，厥等用清清亮亮个吱啁聲來回應！過後幾日，簷脣下已鬧熱，觜項銜泥个烏影，咻下出、咻下入，舊竇个上層，緊沿緊大、緊結緊高，會揬天篷哩喲，阿姆講：「愁麼个，厥等毋會比你較戇啦！」係喲，恁遠所在尋得著路轉、會起屋戴，還毋會屙落來，𠊎正經輸悿悿哦！

        拶腹个鳥竇結都差毋多咧，日時頭兩隻燕照輪飛出去絡食，夜來一隻在竇項，一隻跍在竇脣。阿姆講：「厥等係輪緊在孵卵哦！」正經，成半個月過，斯聽著幼幼个細燕聲咧，總共有四隻，鳥公同鳥嫲出去尋食該下，厥等會乖乖在竇項等，一聽著爺哀銜蟲轉竇个聲說，嘴斯擘大大愛搶食，做爺哀儕个一掖過一掖飛出飛入，四張嘴像無底深坑樣，逐回都嘴擘大啾啾滾討食，怪奇个係，爺哀仰會知哪隻餵過、哪隻吂食？

        細燕生幼毛咧，媸媸个頭那殼不時弄啊弄探出鳥竇來，鳥公、鳥嫲跈緊日頭个腳步還係飛出飛入，無閒濟借。細燕日日大，圓身个羽毛對灰色慢慢轉做烏金个翼毛該下，鳥公、鳥嫲斯會半軟半硬拐厥等學飛，這時節簷脣下當鬧熱，乜係吾等盡歡喜个時節。慢慢，這綱細燕自家會絡食咧，斯恁泥生命過再循環一到，生生不息。勞瀝這竇燕，分吾等體會著生活中个生趣事，同時乜感受著有阿爸阿姆守顧个幸福。 

__________________________

(饒平腔)

        毋知從哪日起勢，屋簷下恬索索咧！打早，大門吂開，心肝斯掛心該烏烏个身影，會落目珠來無？地泥下有屎愛清無？門一開，探頭䀴著个係失望，𠊎等啊等，日頭慢慢徙步，晟到戶檻來咧，空空个鳥竇，等毋著佢个主人，𠊎，等毋著𠊎个人客。

        春天，係造物者變奇術个季節。空氣肚還留有寒天个味緒，過較多息仔个係春天个燒暖。清風撩人，在榮榮个花、嫩嫩个葉莖之間流連，蜂仔摎蝶仔也跈等歡喜採蜜！佢帶來生命，該，係毋係乜會帶來遠方个人客？𠊎日望夜想，出入大門个時節，總會探頭䀴一下，祈求該遠方个人客，千萬毋好毋記得自家个舊竇。 

        一陣吱啁聲從屋簷下傳來，歸屋人走出去，頭臥臥䀴該熟事个身影，舊年个燕仔尋轉來咧，斯停在佢兜舊年結个鳥竇町，兩粒烏烏个頭那探出來，四蕊目珠摎𠊎兜對䀴，算係相借問咧！𠊎兜有摎老朋友見面个歡喜，佢兜用清清亮亮个吱啁聲來回應！過後幾日，屋簷下異鬧熱，觜町銜泥个烏影，咻下出、咻下入，舊竇个上層，緊沿緊大、緊結緊高，會揬著天篷哩喲，阿姆講：「愁麼个，佢兜毋會比你較戇啦！」係喲，恁遠所在尋得著路轉、會起屋戴，還毋會屙下來，𠊎正經輸悿悿哦！

        拶腹个鳥竇結到差毋多咧，日時頭兩隻燕仔輪流飛出去絡食，夜來一隻在竇肚，一隻跍在竇脣。阿姆講：「佢兜輪等在該孵卵哦！」正經，成半個月過，斯聽著幼幼个細燕仔聲咧，總共有四隻，鳥公摎鳥嫲出去尋食該下，佢兜會乖乖在竇肚等，一聽啊著爺哀銜蟲仔轉竇个聲說，嘴斯擘大大搶愛食，做爺哀儕个飛出飛入迆往迆落1，四張嘴像無底深坑樣，逐回都嘴擘大啾啾滾討食，怪奇个係，爺哀仰會知哪隻有供過、哪隻吂食？

        細燕仔生幼毛咧，媸媸个頭那殼不時弄啊弄探出鳥竇來，鳥公、鳥嫲跈等日頭个腳步還係飛出飛入，無閒洎杈。細燕仔日日大，膴身个羽毛對灰色慢慢轉做烏金个翼毛該下，鳥公、鳥嫲斯會半拐半監佢兜學飛，這時節屋簷下盡鬧熱，乜係𠊎兜最歡喜个時節。慢慢，這綱細燕仔自家會絡食咧，斯恁樣，生命再過循環一到，生生不息。承蒙這竇燕仔，分𠊎兜體會著生活中个心色事，同時乜感受著有阿爸、阿姆守顧个幸福。

1 迆往迆落：音 rhieˇ gongˇ rhieˇ log；表視覺形象，兩隻燕連續地相繼飛出去飛回來。 

__________________________

(詔安腔)

        毋知對哪日開始，屋簷下恬卒卒啊！打早，大門吂開，心肝即掛心著遐烏烏个身影，會入𠊎目珠來無？泥下有屎愛清無？門一打開，臥頭䀴著个係失望，𠊎等啊等，日頭款款徙步，照到門斗來啊，空空个鳥藪，等無佢个主人，𠊎，等無𠊎个人客。

        春天，係造物者變奇術个季節。空氣內底猶存有寒天个氣味，擱較多个係春天个燒暖，清風撩人，在鬧鬧个花、嫩嫩个葉莖之間流連，蜂和蝶嘛跈个歡喜採蜜！佢帶來生命，恁，係毋係嘛會帶來遠方个人客？𠊎日望夜想，出入大門个時，總會臥頭䀴下，祈求遐遠方个人客，千萬毋好添放自家个舊藪。 

        一陣吱啁聲對屋簷下傳來，歸屋下人傱出去，頭臥臥䀴遐熟事个身影，舊年个燕子尋轉來啊，即歇在佢人舊年做个鳥藪內底，兩粒烏烏个頭那探出來，四蕊目珠和𠊎人對䀴，算係相借問啦！𠊎人有和老朋友見面个歡喜，佢人用清清亮亮个吱啁聲來回應！過了幾下日，屋簷下真鬧熱，嘴底銜泥个烏影，咻下出、咻下入，舊藪个上緣，越沿越大、越做越高，值討碰著天篷啊哦，阿依講：「擘心麼个，佢人毋會比你較戇啦！」係哦，恁遠所在尋會著路轉來、會起屋蹛，猶毋會屙落來，𠊎正經輸悿悿哦！

        拶腹个鳥藪做到差不多啊，日時頭兩隻燕輪流飛出去絡食，夜來一隻在藪內底，一隻跍在藪脣。阿依講：「佢人輪流在孵卵哦！」正經，成半個月過，即聽著幼幼个鳥么聲啊，攏總有四隻，鳥公和鳥嫲出去尋食遐下，佢人會乖乖在藪內底等，一聽著爺哀夾蟲轉藪个聲說，嘴即擘大大搶討食，做爺哀个一擺擱一擺飛出飛入，四支嘴像無底深坑，逐回攏嘴擘大大啾啾咈討食，怪奇个係，爺哀仰子會知哪隻飼過、哪隻吂食咧？

        鳥么生幼毛啊，䆀䆀个頭那殼不時弄啊弄探出鳥藪來，鳥公、鳥嫲跈著日頭个腳步猶係飛出飛入，無閒挾掣。鳥么一日一日大，膴身个毛對火灰色慢慢轉做烏金个翼毛遐下，鳥公、鳥嫲即會半拐半惑教佢人學飛，這時屋簷下頭鬧熱，嘛係𠊎人頭歡喜个時務。慢慢，這藪鳥么自家會絡食啊，即恁生命擱循環一擺，生生不息。勞力這藪燕子，得𠊎人體會著生活內个心色事，同時嘛感受著有阿怙阿依照顧个幸福。